《公立醫院的悲哀》
年輕時無病無痛，你唔會太重視醫療系統，唯有你病過先會見識到香港醫療係有幾令人痛恨，見到醫護人員罷工我覺得武漢肺炎只不過係一個引爆點，其實一直以來公營醫療人員只係敢怒不敢言。
之前我有提過，細佬佢排期照磁力共振，排到二零二一年十月，足足兩年時間，因為細佬佢有食化療藥，所以每個療程食完都需要覆診，覆診抽血見醫生，醫生好年輕，佢一睇資料，見到下次照期係成兩年後，佢都覺得太長。
我阿媽當然好緊張咁講，咪係囉，點解要咁耐啊……你話係咪草管人命啊！
年輕醫生都好感概講，我都唔知政府個邊點解要咁耐，亦唔明佢地點解唔增加預算去幫助病人，或者佢地都有自己既考慮，而我都希望我地既意見政府可以聽到，只不過呢個情況，我建議你地出去私人診所照，寫紙比你應該會有六至七折，然後拎返黎覆診我地就可以睇到個情況。
言談間，我絕對體會到佢有幾無奈，有邊個醫護唔知政府係幾差，亦知道政府根本唔死到臨頭都唔會接受佢地意見。
正所謂巧婦難為無米炊，醫生再有本事都好，要排兩年先可以睇到報告，病人亦負擔唔到好嘅治療，人生更係不足到令佢地好難進一步跟進，最後落得一個下場就係，頭痛醫頭，腳痛醫腳，唔到最危急都無野可以幫你做。
做得醫護，有邊個唔想救人？有邊個唔想病人係好？你估一次又一次咁見住病人得唔到好照料而離開會有幾難受？
佢哋知道，如果個制度唔再改變，其實佢哋所付出嘅心血將會一次又一次被消滅。
有人話，打緊仗，你唔上前就係逃兵；我亦想講，打緊仗，後勤不力係要斬的；打緊仗，將帥失誤係要問罪的。
當你發現一個創科局既八段錦apps要450萬，當你發現一個廁所要成千萬仲要幾年都未起好，當你發現幾十個鐵欄要幾百萬，而一部救命既磁力共振要排兩年期，你仲可以對呢個政府有乜期待？
年輕醫生同我哋講，我哋絕對係同你企係同一陣線，上面係點都好，我哋都希望你健健康康咁離開醫院。
我覺得，政府真係要買多幾部磁力共振機，然後第一件事照下班官員個腦係咪有事。
Search